ஹஜ் பேசா விசா விவகாரம்: அரசியல்வாதிகள் மற்றும் அவர்களது குடும்பத்தினரின் பட்டியல் என்னிடம் உள்ளது – பிரதி அமைச்சர் முனீர் முலாபர்!

கடந்த காலங்களில் அரசியல்வாதிகள் மற்றும் அமைச்சர்கள் ஹஜ் பேசா விசாக்களை எவ்வாறு பயன்படுத்தினார்கள் என்பது குறித்த முழுமையான விபரங்கள் தற்போதைய அரசாங்கத்திடம் உள்ளதாக சமய மற்றும் கலாசார அலுவல்கள் பிரதி அமைச்சர் முனீர் முலாபர் தெரிவித்துள்ளார்.

நாடாளுமன்றத்தில் சமர்ப்பிப்பதற்கான முழுமையான பட்டியல் தம்மிடம் தயாராக இருப்பதாகவும் அவர் சுட்டிக்காட்டினார்.

இது குறித்து பிரதி அமைச்சர் முனீர் முலாபர் மேலும் கருத்து தெரிவிக்கையில்;

"கடந்த காலங்களில் அரசியல்வாதிகள், அமைச்சர்கள், அவர்களது குடும்ப உறுப்பினர்கள், உறவினர்கள் மற்றும் அவர்களது மனைவியர் இந்த விசாக்களை எவ்வாறு பயன்படுத்தினார்கள் என்பதும், தற்போதைய அரசாங்கமாகிய நாம் இதனை எவ்வாறு பயன்படுத்துகிறோம் என்பதும் எங்களிடம் மிகத் தெளிவாக உள்ளது. இந்த விபரங்கள் அடங்கிய பட்டியலை என்னால் நாடாளுமன்றத்தில் சமர்ப்பிக்கவும் முடியும்.

சில சந்தர்ப்பங்களில், அமைச்சர்களின் நண்பர்கள் கூட இந்த விசாக்களைப் பயன்படுத்தியுள்ளனர். எனினும், நாம் தற்பொழுது மிகவும் வெளிப்படைத்தன்மையுடன் காரியங்களை ஆற்றி வருகின்றோம். எனவே, எங்களுக்கு இதில் எந்தவொரு பிரச்சினையும் இல்லை."என சமய மற்றும் கலாசார அலுவல்கள் பிரதி அமைச்சர் முனீர் முலாபர் மேலும் தெரிவித்துள்ளார்.