ஹோர்முஸ் நீரிணையில் 60 நாட்களுக்கு கட்டணங்கள் கிடையாது - ட்ரம்ப் அதிரடி அறிவிப்பு!

லெபனான் விவகாரத்தில் ஏற்பட்டுள்ள போர்நிறுத்தக் காலப்பகுதியில், சர்வதேச எரிபொருள் போக்குவரத்தின் முக்கிய பாதையான ஹோர்முஸ் நீரிணையில் அடுத்த 60 நாட்களுக்கு எந்தவிதமான கட்டணங்களும் வசூலிக்கப்பட மாட்டாது என அமெரிக்க ஜனாதிபதி டொனால்ட் ட்ரம்ப் தெரிவித்துள்ளார்.

இது குறித்து அவர் தனது 'ட்ரூத் சோஷியல்' சமூக வலைத்தளப் பக்கத்தில் வெளியிட்டுள்ள பதிவில், இந்த 60 நாட்கள் போர்நிறுத்தக் காலம் முடிந்த பின்னரும் கூட ஹோர்முஸ் நீரிணையில் எந்தவொரு கட்டணமும் விதிக்கப்பட மாட்டாது என குறிப்பிட்டுள்ளார்.

அத்துடன் ஒருவேளை இரு நாடுகளுக்கு இடையேயான அமைதி ஒப்பந்தம் முழுமையடையத் தவறினால், மத்திய கிழக்கு நாடுகளுக்குப் பாதுகாப்பு வழங்கும் 'காவல் தூதனாக' அமெரிக்கா ஆற்றிய, ஆற்றுகின்ற மற்றும் ஆற்றப்போகின்ற சேவைகளுக்கான செலவினங்களை ஈடுசெய்யும் பொருட்டு, அமெரிக்காவினால் அல்லது அமெரிக்காவிற்காக மட்டுமே எதிர்காலத்தில் அங்கு கட்டணங்கள் விதிக்கப்படலாம்.

ஹோர்முஸ் நீரிணையை மூடுவதாக ஈரான் எச்சரித்திருந்த பின்னணியில், அங்கு தடையற்ற போக்குவரத்தை உறுதி செய்யும் வகையிலும், அமெரிக்காவின் ஆதிக்கத்தை நிலைநிறுத்தும் வகையிலும் ட்ரம்ப் வெளியிட்டுள்ள இந்த அறிக்கை சர்வதேச ரீதியில் பெரும் உற்றுநோக்கலை ஏற்படுத்தியுள்ளது.