ඊශ්‍රායලය ලැබූ අමෙරිකානු යුධ ආධාරයන් ටොන් ලක්ෂය ඉක්මවයි

ටොන් 6,500ක යුධෝපකරණ තොගයක් ගතවු පැය 24ක තුළදී අමෙරිකා එක්සත් ජනපදයේ සිට ඊශ්‍රායලයට පැමිණි බව එරට ආරක්ෂක අමාත්‍යංශය නිවේදනය කරනවා.

ඒ අනුව මැදපෙරදිග යුද ගැටුම ආරම්භ වු දා සිට මේ දක්වා ඊශ්‍රායලය වෙත ලැබී ඇති යුධෝපකරණ තොගය ටොන් 115,600 ඉක්මවා ඇති බවයි වාර්තාවන්නේ.

මෙම යුධෝපකරණ තොගය අතරට පතොරම්, හමුදා ට්‍රක් රථ, JLTV වර්ගයේ සන්නද්ධ යුද රථ මෙන්ම හමුදා උපකරණ රැසක් ඇතුළත් බවයි වාර්තාවන්නේ.

ඊශ්‍රායල ආරක්ෂක අමාත්‍යාංශය පවසන්නේ පසුගිය පෙබරවාරි 28 දින ඉරානය සමඟ ආරම්භ වූ යුද ගැටුමත් සමඟ ගුවන් ගමන්වාර 403කින් සහ නෞකා 10ක් මගින් යුධෝපකරණ ටොන් 115,600කට වඩා ලැබී ඇති බවයි.

ඊශ්‍රායල ආරක්ෂක අමාත්‍ය ඊශ්‍රායල් කැට්ස් පවසන්නේ ඕනෑම අවස්ථාවක ඕනෑම තැනක සතුරන්ට එරෙහිව පූර්ණ ශක්තියෙන් ක්‍රියා කිරීමට අවශ්‍ය සියලු පහසුකම් ඊශ්‍රායල ආරක්ෂක හමුදාව සතු බවයි.