ප්‍රවීණ ඉන්දීය රංගන ශිල්පී අසරානි දිවි ගමනට සමුදෙයි

ප්‍රවීණ ඉන්දීය විකට රංගන ශිල්පී ගෝවර්ධන් අසරානි (Govardhan Asrani) මියගොස් තිබෙනවා.

කෙටි අසනීප තත්ත්වයකින් පසු 84 වන වියේ පසුවූ ඔහු රෝහලකදී ප්‍රතිකාර ලබමින් සිටියදී මෙසේ මියගොස් ඇති බවයි විදෙස් මාධ්‍ය සඳහන් කරන්නේ.

චිත්‍රපට 300 කට අධික සංඛ්‍යාවක චරිත රැසක් නිරූපණය කළ ඔහු, "ෂෝලේ" (Sholay) චිත්‍රපටයේ "හම් අංග්‍රේසෝන් කේ සමනේ කේ ජේලර් හේ" (Hum angrezon ke zamaane ke jailer hain) යන දෙබසින් ප්‍රේක්ෂකයන් අතර ඉතා ජනප්‍රිය වූවා.

අසරානි මහතා ඉන්දීය සිනමාව තුළ සිය අසමසම විකට රංගනයට ප්‍රසිද්ධියක් ඉසිලූ අතර, රසිකයන් වැඩි වශයෙන්ම සිහි කරන්නේ 1975 වසරේ තිරගත වූ "ෂෝලේ" චිත්‍රපටයේ ඔහු විසින් නිරූපණය කළ ඒකාධිපති ජේලර් චරිතයයි.

වසර ගණනාවක් ගත වී ඇතත් එම චරිතය තවමත් ප්‍රේක්ෂකයන් අතර සිනහවක් ඇති කරනු ලබනවා.

ඔහුගේ කළමනාකරු වන බාබුබායි තිබා පැවසුවේ, හුස්ම ගැනීමේ අපහසුතා හේතුවෙන් දින හතරකට පෙර මුම්බායිහි ජූහු ප්‍රදේශයේ රෝහලට ඇතුළත් කළ බවත්, පෙණහලුවල ජලය එකතු වී තිබූ බව වෛද්‍යවරුන් දැනුම් දුන් බවත්.

වසර පනහක් පුරා විහිදුණු සිය වෘත්තීය ජීවිතය තුළ ඔහු රාජේෂ් ඛන්නා, අමිතාබ් බච්චන්, ආමීර් ඛාන් වැනි සෑම ඉහළම නළුවෙකු සමගම රංගනයෙන් දායක වී තිබෙනවා.

ඒ අනුව, "ෂෝලේ" හි ජේලර්, "ආජ් කී තාසා ඛබර්" (Aaj Ki Taaza Khabar), "චෝටි සී බාත්" (Chhoti Si Baat), "බාවර්චි" (Bawarchi), "අභිමාන්" (Abhimaan), "චුප්කේ චුප්කේ" (Chupke Chupke), "රාෆූ චක්කර්" (Rafoo Chakkar), "හේරා ෆේරි" (Hera Pheri), "භූල් භූලෙයියා" (Bhool Bhulaiyaa) ඔහු රංගනයෙන් දායක වූ නිර්මාණයන් වෙනවා.

ඔහුගේ අවසන් කටයුතු ඊයේ සවස (20) පවුලේ අය සහ සමීප මිතුරන්ගේ සහභාගීත්වයෙන් සිදු වූ බවයි විදෙස් මාධ්‍ය සඳහන් කරන්නේ.