කාන්තා එක්දින ක්‍රිකට් ලෝක කුසලානය; ඔස්ට්‍රේලියාවට එරෙහිව ශ්‍රී ලංකා ක්‍රීඩිකාවන් හෙට තරග බිමට

2025 ලෝක කුසලාන කාන්තා එක්දින ක්‍රිකට් තරගාවලියේ ශ්‍රී ලංකා ක්‍රීඩිකාවන් සහභාගිවන මූලික වටයේ දෙවැනි තරගය වත්මන් එක්දින ලෝක ශූරියන් වන ඔස්ට්‍රේලියානු ක්‍රීඩිකාවන් සමග හෙට පැවැත්වීමට නියමිතයි.

මෙම තරගය කොළඹ ආර්. ප්‍රේමදාස ක්‍රීඩාංගණයේදී පැවැත්වෙන අතර ශ්‍රී ලංකා ක්‍රීඩිකාවන් මෙවර ලෝක කුසලානයේ, ශ්‍රී ලංකාවේදී මුහුණ දෙන පළමු තරගයද මෙයයි.

සමාරම්භක තරගයේදී ඉන්දීය ක්‍රීඩිකාවන් හමුවේ පරාජය වී යළි ජයග්‍රාහී රිද්මයට පැමිණීමේ අරමුණින් සිංහ ධේනුවන් මෙම තරගයට එක්වෙද්දී ඔස්ට්‍රේලියා ක්‍රීඩිකාවන් සිංහ සටනට පිවිසෙන්නේ නවසීලන්තයට එරෙහිව ලද සුපිරි ජයග්‍රහණයෙන් අනතුරුවයි.

මේ අතර ශ්‍රී ලංකා තරගයට සහභාගිවීම සඳහා ඔස්ට්‍රේලියානු ක්‍රීඩිකාවන් ඊයේ රාත්‍රියේ දිවයිනට පැමිණ තිබුණා.

මෙම තරගය වෙනුවෙන් ශ්‍රී ලංකා ක්‍රීඩිකාවන් අද පස්වරුවේදී සිය අවසන් පුහුණු සැසිය සඳහා එක්ව සිටියා.

ශ්‍රී ලංකාව සහ ඔස්ට්‍රේලියාව අතර තරගය හෙට පස්වරු 3.00ට ආරම්භවීමට නියමිතයි.